Act 23 | GAM | STEP | Pol Juda una kerman moi al dongall kane molo embe dji, agana kabono, asa na singare ye wanill mal ne, ipon ye wando ge, na God nale al wando, ke ta nayendo dje pro.

Acts 23

1 Pol Juda una kerman moi al dongall kane molo embe dji, agana kabono, asa na singare ye wanill mal ne, ipon ye wando ge, na God nale al wando, ke ta nayendo dje pro. 2 Opa gale awi iwa ta kantau yei una moi ge kandjiye Ananaias we dji. Une kandja embe djika, Pol manda moi al una djillake al toi. 3 Tomaka, Pol embe dji, God ni tonda! Gull ta bis yei al una wopake kanne dje kopong kuruwo yenj mal ge, ni gull embe mal moren. Ni Mosis lo pille we ye na kot aunden ba, ni kandja djin una na tonj ge, Mosis loye ge ni mop aunden we dji.

4 Pol moi al una manda moi ge embe dji, iwa djinden ge opa gale awi iwa kantau yei una, ba ni kandja ke dje aunden we dji. 5 Djimaka Pol embe dji, agana kabono, iwa ge opa gale awi iwa kerman ge na nakanill. Baibel embe djindo, ye unakne kerman kambono pille embe yenj we nadjine we dji, ba na ke yell we dji.

6 Pol kani, una kerman kambono moi ge pende Sadusi una moi, pende Parisi moi. Ge pille, Pol kane yau to embe dji, agana kabono! Na Parisi una moro. Na nena kambono moi ge Parisi una moi, ba ye na kot ye awinj ge una gor alla aglo wo er gun pine we dje na kui ye moro al ge, ye na kot ye awinj we dji.

7 Pol kandja embe djika, Parisi una ne, Sadusi una nonga dje er djelldjell pi. 8 Kambono dji ge me embe mal pai. Sadusi una tau agelo ge ta namor dje pir. Una gor ge aglo er wo gun napine. Wal murble mo minman ge ta namoro. God Murble ge aike namoro dje pir. Ba Parisi una ge moro we djinj. 9 Epil soka ge yau kerman topillka, lo dje awi Parisi una pende moi ge alla aglo kandja dongall dje awo embe dji, no kanpin iwa ge ke ta nayei. Tau agelo ta wo une moi al kandja ta djinda dji, mo kupill al wal ta wo kandja ta dji dal, no kandja ta djimbon, kune nayenda we dji. 10 Dji ba una yau to molmaka, ami iwa kerman ta moi ge kani kambono kunda kakbon dje yei. Pende po Pol agle yem amblo bu djimaka, pende yem djimaka, Pol gakle kelip tonda paro dje kane, ami iwa kerman yene amiye una moi al embe dji, ye kal po Pol i ami numb numog worme dji.

11 Djika i numog wormaka, imina paika, Iwa Kerman Jisas wo Pol moi al embe dji, ni kand nagole. Na kandjinambe wopake ni Jerusalem kandja dje pene worin mal, ni alla Rom po kandja djimbenka una piye we dji.

Juda una kandja begle Pol to gopon we dji

12 Kam tagika Juda una wo seke molo kandja dongall dje pagle embe dji, kwa ne, nu nanambon, Pol to golo are nambon we dji. 13 Juda una kandja embe dji ge iwa 4-pela ten (40) plato moi. 14 Kambono po opa gale awi iwa kerman kambono ne, Juda una ngambalne pai una moi al embe dji, no kandja dongall dje aupin. Kwa ne, nu kaima nanambon. Pol to golo are nambon we djipin. 15 Djipin ge ye mor ge ne, Juda una kerman kot pir una ge, ye ami iwa kerman wekle pundo una moya al po kende dje aune, Pol kandja asa dji mal no pille kune nayepin. Pol wo kandja djinda no pille kune yembon we djine. No po kondwe tambiye bambo pa moponka wondaka to gopon we dji.

16 Dji ba Pol ambe warye ge pille er ami una numbne al po Pol moi al dje awi. 17 Pol pille ami iwa kerman ta moi al po embe dji, womba wondo ge ni dje ipo ami iwa kerman wekle pi una moro al worbena, womba kandja ta djindaka piya we dji. 18 Djika ami iwa kerman ge dje ipo ami iwa kerman wekle pi una moi al woro embe dji, Pol kaye pai ge une na moll al embe dji, ni womba ge dje ipo ami wekle pi una moro al worbenka, une kandja djindaka piyambe dji.

19 Djika ami iwa kerman wekle pi una po womba agle amblo i djeke worika, soka yenekne mopillka ami ge embe dji, ni na boll naral kandja pai djimben ne? dji. 20 Djika womba ge embe dji, Juda una ni moren al wo kandja embe djine, Pol kandja asa dji mal Juda una kerman kambono pille i kune nayei. Une alla wo djinda pupon we djine we dji. 21 Ga kandja embe djine ba ni napupen. Ge kende dje molo, ga seke ye bambo pa molo Pol kondwe tambiye wonda to gopon we dji. Una kandja embe dji ge 4-pela ten (40) mal plato embe molo kandja embe dji, kwa ne, nu nanambon, Pol to golo are nambon we dji. Ni pora we djimben dje pille tau mor we dji. 22 Womba ge embe djika ami iwa kerman ge embe dji, ni er piye! Kandja ipon dje na aunden ge una ta dje nawe! dji. Dje worika womba ge er pi.

Una dje wormaka Pol er iwa kerman Peliks moi al kot pi

23 Ami iwa kerman wekle pi una ge djika yene amiye iwa soka wopillka, une embe dji, ye po ami una tu andret (200) dje i, os ap tonj una ami ge 7-pela ten (70) dje i, kulag amblo mor ami ge tu andret (200) dje ibellka, imina 9 oklok yei dal, ye er dumo Sisaria pume! dji. 24 Alla os pende Pol ap to i punda os ge, ye amblokun yembell. Pol er dumo Sisaria iwa kerman Peliks moro al punda ge wopake pundambe dji. 25 Iwa ge pepa bolo embe dji,

26 na Klodius Lisias pepa bolo namba wan gapman Peliks, na ni wopake we dje aundo. 27 Juda una iwa ge amblo gi dje to gopon dje yei ba, una dji pill une Rom una ta moro we dji. Ge pille, na ami una boll po i yem woro awill. 28 Na embe pill, iwa ge ke namba mal yei pille Juda una to kot ninga dje awinj ne? dje pille, Juda una kerman kot pir una moi al na Pol dje worill. 29 Na kanill, une ga loine pai mal to wori mo embe ta yei pille ga kot ye awi. Ba una i kaye numb worne mo gapman to goya ge na kanill kune nayendo. 30 Are una na moll al wo embe dji, Juda una kandja begle kond kui ye molo Pol wonda to gopon we djinj we dji. Embe dji pille, na ni mon al ola dje, dje wordo. Una Pol boll kot ye aumbon we djinj ge na embe djindo, ye kot ye aune panda, ye iwa kerman Peliks moro al kot djine we djill. Une pepa embe boika,

31 imina pika ami iwa kerman wekle pi una kandja dji mal pille ami una po Pol dje ipo dumo Antipatris wori. 32 Kam kumaike kana, ga ami makimb al waninj una er yem numbine Jerusalem pumaka, alla os al wani ami ge Pol dje i er dumo Sisaria pi. 33 Po ami iwa kerman wekle pi una pepa bolo awi pepa ge iwo gapman iwa kerman moi al awi. Pol para aike iwo une agle al wori. 34 Gapman iwa kerman ge pepa kere kane embe dji, iwa ge nam pall iwa ne? dji. Pol embe dji, na propins Silisia iwa moro we dji. 35 Djika iwa ge Pol moi al embe dji, ga ni kot ye aune una woneke, na kot piyo we dji. Alla yene ami una moi al embe dji, ye une ge ipo Erot gapman numbiye al worneke une kaye pandaka, ye kane gi dje molme dji.